जिल्ला प्रशासन कार्यालय काभ्रेले होली (फागुपूर्णिमा) लाई मर्यादित बनाउन सबैमा अनुरोध गरेको छ । सहायक प्रमुख जिल्ला अधिकारी अमरदीप सुनुवारले एक सूचना जारी गर्दै होलीमा कसैलाई पनि इच्छाविपरित रङ नदल्न आग्रह गरेका छन् ।

होली मनाउने नाममा रीतिरिवाज र परम्परा विपरीत उच्छृङ्खल क्रियाकलाप नगर्न प्रशासनले आग्रह गरेको हो । सूचनामा सर्वसाधारणलाई दुःख दिने, इच्छा विपरीत रङ दल्ने, लोला तथा फोहर पदार्थले हान्ने, मादक पदार्थ सेवन गरेर अवाञ्छित क्रियाकलाप गरी शान्ति सुरक्षामा खलल पुग्ने गतिविधि नगर्न भनिएको छ ।

त्यस्तै बाटो अवरोध गरी पैसा असुल्ने जस्ता क्रियाकलाप नगर्न पनि प्रशासनले आग्रह गरेको छ । काठमाण्डौ उपत्यकासहित पहाडी क्षेत्रमा भोलि र तराईका जिल्लामा पर्सि होली मनाइँदै छ ।