नेपालगन्ज, १२ जेठ । मुस्लिम समुदायले पवित्र रामजान महिनामा निर्वाचन नगर्न माग गरेको छन् । प्रमुख जिल्ला अधिकारी रविलाल पन्थ मार्फत प्रधानमन्त्रीलाई निर्वाचनको मिति रामजान पछाडि सार्नु पर्ने माग राख्दै ज्ञापन पत्र बुझाएका छन् । ‘मुस्लिम समुदायको धार्मिक भावनाको कदर गर्दै निर्वाचनको मिति रामजान महिना पछाडी सार्न सरकारको ध्यानाकर्षण गराउन जिल्ला प्रशासन कार्यालय मार्फत ज्ञापन पत्र पेश गरेको छौ ।’
ज्ञापन पत्रमा भनिएको छ । नेपालको संविधानमा व्यवस्था भएको धर्म्निरपेक्षताको अधिकार र मतदानको अधिकार समेत सुनिश्चित गर्न निर्वाचन सार्नु अपरिहार्य रहेको ज्ञापन पत्रमा उल्लेख गरिएको छ । मुस्लिमहरुको पवित्र रामजान महिना जेठ १२÷१३ गतेबाट शुरु भई असार १२÷१३ गते समापन हुनेछ । उनीहरुले सो अवधी पानी समेत नपिई रोजा(व्रत) बस्छन् । रोजाको अवधिभर विहान ४ बजेबाट बेलुका सवा ७ बजेसम्म मुस्लिम समुदायले अन्न,पानी समेत नखाई ब्रत बस्ने भएका कारण मुस्लिम उम्मेदवार र मतदाता दुवैलाई प्रभाव पर्ने ज्ञापन पत्र बुझाउदै मस्लिम हक अधिकार संरक्षण मञ्च नेपालगन्जका अध्यक्ष महमुद आलम सिद्धिकीले बताउनुभयो । उनले उम्मेदवार र कार्यकर्तालाई जेठ महिनाको उर्खमालो गर्मीमा व्रत बसि प्रचार प्रसारमा धेरै अफ्ठयारो पर्ने र मतदाताको सहभागिता प्रभावित हुने समेत बताउनुभयो । ज्ञापन पत्र बुझदै प्रमुख जिल्ला अधिकारी पन्थ तत्कालले ज्ञापन पत्र प्रधानमन्त्री कार्यालय पठाउने जानकारी दिनुभयो ।