बुधबार, असार १८, २०८२
बागमती प्रदेशकै लामो पक्की पुल सिन्धुलीको हरिहरपुरगढीमा बन्ने भएको छ । सिन्धुलीको हरिहरपुरगढी गाउँपालिका वडा नं. २ र ४ जोड्ने मरिण खोलामा पक्की पुल शिलान्यास गरिएको छ ।
आज आयोजित एक कार्यक्रमका बिच बागमती प्रदेश सरकारका मुख्यमन्त्री राजेन्द्र प्रसाद पाण्डेले पुलको शिलान्यास गरेका हुन् । यससंगै मरिण खोलामा पुल बनेपछि काभ्रेका नागरिक पनि लाभान्वित हुने भएका छन् ।
विशेषगरी सिन्धुलीको हरिहरपुरगढी गाउँपालिका,काभ्रे र मकवानपुरका नागरिकले सहजै सर्लाही सहित तराईका जिल्लाहरूमा आवतजावत गर्न सुविधा पाउनेछन् ।
२ सय ६२ दशमलब ४० मिटर लामो मरिण खोला पुल बागमती प्रदेश सरकारको कुल १९ करोड २४ लाख ४१ हजार ८ सय १७ रूपैयाँ ६३ पैसा लागतमा निर्माण सुरू भएको हो । पुल निर्माणको ठेक्का हिम्दुङ र थोकर इम्यानुयल सारस जे.भीले पाएको छ ।
बागमती प्रदेश सरकारले आफ्नै बजेटमा निर्माण गर्न थालेको यो पुल प्रदेशकै नमुना र लामो पुलको रूपमा रहेको बागमती प्रदेश सरकारको भौतिक पुर्वाधार विकास मन्त्रालयका सचिव अशोेक शाहले जानकारी दिए । निर्माण कम्पनीले २०७९ पुष २२ गते भित्र पुल निर्माणको काम सम्पन्न गर्नुपर्ने छ ।
