सिन्धुपाल्चोक जिल्लाको चौतारा साँगाचोकगढी नगरपालिका क्षेत्रमा एक बालिकालाई करणी गरेको आरोपमा प्रहरीले एक १६ वर्षे किशोरलाई पक्राउ गरेको छ । जिल्ला प्रहरी नायब उपरीक्षक दक्षकुमार बस्नेतका अनुसार चौतारा साँगाचोकगढी नगरकै एक ७ वर्षीया बालिकालाई बलात्कार गरेको आरोपमा ती किशोरलाई नियन्त्रणमा लिइएको हो ।
आइतबार बालिकालाई बलात्कार आरोप लागेका बालकलाई पक्राउ गरी आवश्यक सोधपुछ र थप अनुसन्धान सुरु गरिएको उनले बताए ।

साता दिनअघि दिउँसोको समयमा छिमेकी बालिकालाई कसुरजन्य कार्यको आरोप लागेका बालकले आफ्नै घरमा लगेर करणी  गरेको पीडित पक्षको जाहेरीमा उल्लेख भएको उनको भनाइ छ । ‘आरोपीलाई नियन्त्रणमा लिएर जिल्ला अदालतबाट ५ दिनको म्याद अनुमति लिएका छौं, थप अनुसन्धान भइरहेको छ,’ उनले भने ।