बिहिबार, बैशाख १३, २०८१
स्थानीय तहकै लापरवाहीले गोरखाका अधिकांश स्वास्थ्य संस्थामा औषधी अभाव
खरिदका लागि आएको रकम पनि खर्च भएन
१६ कात्तिक, गोरखा । गाउँपालिकाकै लापरवाहीका कारण गोरखाका अधिकांश स्वास्थ्य संस्थामा औषधी अभाव भएको छ ।यसअघि जिल्ला जनस्वास्थ्य कार्यालयमार्फत् खरिद गरेर सबै स्वास्थ्य संस्थामा पठाइने गरेको थियो । अहिले हरेक स्थानीय तहमा औषधी खरिदका लागि बजेट विनियोजन भएको छ । तर, उक्त बजेटको सदुपयोग गर्न गाउँपालिकाहरुले चासो दिएका छैनन् ।
करिब एक सातादेखि धार्चे गाउँपालिकाको गुम्दामा फैलिएको मौसमी भाइरल औषधी अभावकै कारण नियन्त्रणमा आउन सकेको छैन । बिरामीहरुलाई तातोपानी पिउन सुझाव दिँदै फर्काइने गरेको छ ।
कार्यकारी अधिकृत नहुँदा औषधी खरिद गर्न नसकिएको उक्त गाउँपालिकाका अध्यक्ष सन्तोष गुरुङले बताए । उनले भने, ‘उधारोमा भए पनि औषधी खरिद गर्न भनिसकेको छु ।’कार्यकारी अधिकृत नहुँदा आर्थिक नियमावली र व्यवस्थापन गर्न नसकिएकाले खरिद प्रक्रिया अगाडि बढाउन नसकिएको उनले बताए ।
जिल्लाका अधिकांश स्थानीय तहले औषधी खरिदका लागि निकासा भएको बजेट खर्च गर्न सकेका छैनन् । ‘कोटेसन’बाटै पाँच लाखसम्मको औषधी खरिद गर्न सकिन्छ, फेरि बोलपत्र आव्हान गरेर २० लाखसम्मको खरिद गर्न मिल्ने प्रावधान छ । ‘तर, औषधी खरिदमा स्थानीय तहले किन ढिलाइ गरिरहेका छन्, थाहा छैन,’ जिल्ला जनस्वास्थ्यका एक कर्मचारी भन्छन् ।- अनलाईन खबर बाट
