काठमाडौं । ६० किलोभन्दा बढी सुन तस्करी प्रकरणको दोस्रो चरणको अनुसन्धानमा पक्राउ परेका एक चिनियाँबाट नेपाली नागरिकता फेला परेको छ ।
राजु र कुंग भनेर चिनिने टासीबाट बरामद भएको नेपाली नागरिकता सक्कली रहेको समेत पुष्टि भएपछि प्रहरीको केन्द्रीय अनुसन्धान ब्यूरो (सीआईबी)ले यसतर्फ पनि अनुसन्धान अघि बढाएको छ ।
१२ जेठमा पक्राउ परेका ४१ वर्षीय चिनियाँ नागरिक गंगा टासीबाट काठमाडौंबाटै जारी भएको नेपाली नागरिकता फेला परेको होे ।
नागरिकतासँगै उनीबाट नेपाली राहदानी र सवारी चालक अनुमतिपत्र (लाइसेन्स) पनि भेटिएको छ । टासीबाट ७ राउन्ड गोली लोड भएको जर्मन अटोमेटिक पेस्तोलसमेत बरामद गरिएको छ ।
सोनाम गुरुङको नाममा उनले नेपाली नागरिकता लिएको सीआईबीका प्रवक्ता तथा एसपी होविन्द्र बोगटीले बताए । उनी सन् २०१८ देखि फ्लायट भाडामा लिएर काठमाडौंमा बस्दै आएका थिए ।