काठमाडौं । नेकपा एमालेका सांसद गोकुल बास्कोटाले किसानलाई रुवाएर सरकार हाँसेर बसेको आरोप लगाएका छन् ।
प्रतिनिधिसभाको बैठकमा बोल्दै सरकार र मन्त्री फेरिएपनि दूध किसानको समस्या समाधान नभएकोप्रति आपत्ति जनाए । उनले दूध किसानको रकम भुक्तानी गर्न सरकारलाई ध्यानाकर्षण गराएका छन् ।
‘दूध किसानले न्याय पाउन सकेका छैनन् । उनीहरुले भीख मागेका होइनन् । किसानले परेसानको मूल्य मागेको हो । यो समस्या जति तन्काउँछौं सरकारको लोकप्रियतामात्रै होइन सरकारको क्षमता र जवाफदेहितामा प्रश्न उठिरहेको छ । एकजनाको कुरा होइन । देशैभरीका किसानको कुरा हो । निजी क्षेत्रले पनि तिर्न बाँकी छ । ऊसित पनि संवाद गर्नुपर्यो ’ उनले भने ।