काभ्रे । असोज दोस्रो सातामा परेको बाढीका कारण क्षति पुगेको विपि राजमार्गको पुनर्निर्माण कार्य तीव्र रूपमा अगाडि बढाइएको छ। भक्तपुरस्थित सडक डिभिजन कार्यालयले क्षतिग्रस्त सडक खण्ड पुन: निर्माण गर्नका लागी व्यवस्थित बनाउन तीनवटा ठेक्का आह्वान गरिसकेको छ।

सडक डिभिजन कार्यालय भक्तपुरका इन्जिनियर तथा विपि राजमार्ग साइट इन्चार्ज दुर्गा प्रसादका अनुसार, आगामी बर्खामा सवारी सञ्चालनमा कुनै समस्या नआओस् भन्ने उद्देश्यले हाल ३५ जना कर्मचारी नियमित रूपमा सडक व्यवस्थापन कार्यमा संलग्न छन्।

“विपि राजमार्गको प्रमुख समस्या बर्खाको समयमा सवारी आवागमनमा आउने अवरोध हो। यसलाई न्यून गर्न हामीले डाइभर्सनलाई व्यवस्थित गर्दै नियमित रुपमा मर्मत कार्य गरिरहेका छौं,” इन्जिनियर प्रसादले बताए।

डिभिजन कार्यालयका अनुसार, बर्खामा सडकमा पानीको निकास सहज बनाउन आवश्यक पूर्वाधार निर्माण भइरहेको छ। साथै, पहिरो प्रभावित क्षेत्रहरूमा विशेष निगरानी राख्दै सुरक्षात्मक उपायहरू अपनाइएको छ।

स्थानीयवासी र चालकहरूले समेत डिभिजन कार्यालयको प्रयासको सराहना गरेका छन्। उनीहरूका अनुसार, पछिल्ला वर्षहरूमा बर्खाको समयमा यात्रा कठिन भए पनि यसपालि समयमै पुनर्निर्माण कार्य भइरहेको छ, जसले गर्दा यातायातमा सहजता आउने अपेक्षा गरिएको छ।

सडक डिभिजन कार्यालय भक्तपुरले आगामी दिनमा थप प्रभावकारी व्यवस्थापनको योजना बनाएको बताएको छ। यदि कार्य योजनाअनुसार सबै कार्य पूरा भएमा, आगामी बर्खामा विपि राजमार्गमा यात्रु तथा सवारीसाधनलाई कुनै ठूलो समस्या नआउने विश्वास गरिएको छ।