नेपालले रोजगार अनुमति प्रणाली (इपीएस) अन्तरगत सन् २०१८ को कोरियन भाषा परीक्षाको फारम यस पटक अनलाइन मार्फत हुने भएको छ । हरेक वर्ष परीक्षाका लागि दखास्त आह्वान गर्दै आएको यस पटक चैत ९ देखि १८ गतेसम्म इपीएस परीक्षाको अनलाइन आवेदन फारम बुझ्न कोरियाको मानव संशाधन विभागलाई प्रस्ताव पठाइएको इपीएस कोरिया शाखाका निर्देशक बाबुराम खतिवडाले बताए ।
शाखाले आफ्नै स्रोतबाट खर्च गर्ने गरी गतवर्ष नै अनलाइन प्रणाली विकास गरेको थियो । तर, परीक्षण नसकिँदा प्रयोग गर्न सकिएको थिएन । यो पटक भने अनलाइन फारम भर्न सकिनेछ । यसले गर्दा फराम भर्न रातभर लाइन बस्नु पर्ने बाध्यता हटेको छ ।
अनलाइनमा फारम भर्न तोकिएका बैंकमा आवेदन शुल्क भने पहिले नै बुझाउनु पर्नेछ । बैंकबाट रकम जम्मा गरेको कोड राखेपछि मात्रै अनलाइनफारम ‘सब्मिट’ गर्न सकिनेछ । साथै मेसिन रिडेबल पासपोर्ट (एमआरपी) अनिवार्य हुनेछ । गतवर्षदेखि नै विभागले एसआरपी अनिवार्य गरेको थियो ।
महिनाको १ लाख भन्दा बढी कमाउने भएका कारण बैदेशिक रोजगारीका लागि आकर्षक गन्तव्य भएका कारण धेरै नेपाली युवाहरुको आवेदन पर्ने गरेको छ र, फारम बुझाउन दिन रात नैै लाइन बस्नुपर्ने बाध्यता यस पटक हट्ने स्रोतको दाबी छ । गतवर्ष ७० हजार भन्दा बढीले कोरिया भाषा परीक्षा दिएका थिए ।