सबैको समाचार
सोमवार, कार्तिक १०, २०७७
  • होमपेज
  • काभ्रेको भुम्लुमा मुलखर्क भिम्सेनथान मन्दिर निर्माणमा ढिलाइ

काभ्रेको भुम्लुमा मुलखर्क भिम्सेनथान मन्दिर निर्माणमा ढिलाइ

काभ्रेको भुम्लुमा मुलखर्क भिम्सेनथान मन्दिर निर्माणमा ढिलाइ

धुलिखेल, २३ जेठः काभ्रेको भूम्लु गाउँपालिका वडा नम्बर १ सापिङ्गको मुलर्खक भिमसेनथान मन्दिर निर्माणमा ढिलाइ भएको भन्दै स्थानीयले चिन्ता ब्यक्त गरेका छन् । बागमति प्रदेश सभाका सदस्य लक्षमण लम्सालको पहलमा मन्दिर निर्माणका लागि विनियोजित ५० लाख र गाउँपालिकाको ३० लाख गरी ८० लाख रुपैयाँ बजेट परेको छ । तर काम भने अहिलेसम्म अघि बढ्न सकेको छैन ।

२०७६ साल पुस २० गते वडाध्यक्ष खिर बहादुर श्रेष्ठको उपस्थितिमा स्थानीय रेशम बहादुर तामाङ अध्यक्ष रहेको उपभोक्ता निर्माण समिति गरिएको थियो । तर यो समितिलाई निर्माणको काम गर्ने भन्दा पनि रेखदेख गर्ने अख्तियारी दिइएको थियो । पालिकाले ठेकेदार मार्फत काम गर्ने भनेको थियो । तर लामो समयसम्म पनि पालिकाले टेण्डर आह्वान नगरेर चैत ९ गते तामाङ अध्यक्ष रहेकै समितिलाई योजना सम्झौता गरेको थियो ।

योजना सम्झौता भएको दुई दिन पछि नै लकडाउन सुरु भएकाले मन्दिर निर्माणको काम अघि बढ्न नसकेको उपभोक्ता समितिका अध्यक्ष तामाङले बताए । योजना सम्झौता भएपनि उपभोक्ता समितिले पेश्की समेत लिएको छैन । ‘सुरुमा हामीलाई काम गर्ने जिम्मा दिइएको थिएन्, योजनाको रेखदेख मात्रै गर्ने भनिएको थियो, तामाङले भने ‘तर पछि उपभोक्ता समिति मार्फत नै काम गरौँ, योजना सम्झौता गर्नु पर्यो भन्नु भयो, योजना त सम्झौता भयो तर लगत्तै लकडाउनले गर्दा काम अघि बढ्न सकेन ।’

भिमसेनथानमा गणेशको मन्दिर बनाउने, दुई वटा पिकनिक स्पोर्ट र महिला–पुरुष शैचालय बनाउने भनिएको छ । तर सुरुमा के–के पूर्वाधार बनाउने भन्ने नै अन्योल भएका कारण पनि काम अघि बढ्न नसकेको स्थानीयहरु बताउँछन् । चालु आर्थिक वर्षभित्रै सकाउनु पर्ने बजेट जेठ अन्तिमसम्म पनि खर्च हुन नसकेपछि गाउँको विकास निर्माणका लागि आएको बजेट फिर्ता जाने चिन्ता बढेको स्थानीय प्रल्हाद खत्रीले बताए । ‘अबको एक महिनाभित्र कसरी काम सकिन्छ भन्ने चिन्ता लागेको छ, हाम्रो त यो लेकको ठाउँ हो बर्षा हुन थालिसक्यो, खत्रीले भने ‘जुन प्रयोजनका लागि गाउँमा पैसा आएको हो त्यो रकम समयमै गुणस्तरीय कामका लागि खर्च हुदँैन कि भन्ने चिन्ता बढेको छ ।’

उपभोक्ता समितिका अध्यक्ष तामाङले अर्को बुधबार, बिहीबारबाट काम सुरु गर्ने गरी प्रक्रिया अघि बढाइएको बताए । निर्माणका लागि आवश्यक पर्ने सामग्री समेत नपाएकाले लकडाउनको बीचमा काम सुरु गर्न नसकिएको उनको भनाइ छ ।

तपाइको प्रतिक्रिया दिनुहोस्

Your email address will not be published. Required fields are marked *

हामी तपाईंको इमेल अरू कसैसँग साझा गर्दैनौं।

ट्रेन्डिङ

धेरै कमेन्ट गरिएका