काभ्रेमा को रो ना भाइरसको ओमिक्रोन भेरियन्ट तीब्रगतिमा गाउँ गाउँसम्म पुगेको छ ।

तर कोरोना भाइरस रोकथामका लागि सरकारी प्रयास र तयारी भने निकै फितलो देखिएको छ ।

जिल्लाका प्राय जसो स्थानीय तहमा यसअघि निर्माण गरिएका आइसोलेसन सेन्टरहरु अझै सञ्चालनमा ल्याइएको छैन् । कोभिडका गम्भीर बिरामीहरुलाई जिल्लाको दुई ठूला अस्पतालहरुले सहज रुपमा भर्ना लिन मानिरहेका छैनन् ।

धुलिखेल अस्पतालले यसअघिका दुईवटा भेरियन्टमा सबैभन्दा बढी कोभिड बिरामीको उपचार गरेको थियो ।

तर अहिले धुलिखेल अस्पतालले स्वयम पनि तयारी पहिलेको जस्तो गरेको छैनन् । सबैभन्दा बढी कोभिडका विरामी धुलिखेल नगरपालिका र बनेपा नगरपालिकामा छन् ।

यी दुई नगरपालिकाले पछि पहिलो र दोस्रो भेरियन्टमा जस्तो कोभिड नियन्त्रणका लागि तयारी गरेका छैनन् । घरघरमा बिरामी छन् । परीक्षणको दायरा बढाइएको छैन् । स्वास्थ्यको कर्मीको प्रत्यक्ष निगरानीमा हुनु पर्ने बिरामीसमेत घरैमा छन् । यसले गर्दा पनि कोभिड फैलन थप मद्दत पुगेको देखिएको छ ।

समन्वयको अभाव निकै खड्किएको देखिन्छ । एन्टिजेन परीक्षण पालिका पालिकामा भइरहेपनि त्यसको गुणस्तरीयता लागेको प्रश्न चिन्ह अझै हटेको छैन् । अर्थात् एन्टिजेनबाट गरिएको परीक्षण भरपर्दो रहेको चिकित्सकहरु बताउँछन् ।

ओमिक्रोन भेरियन्ट फैलिए यता एक जनाको नि धन भइसकेको छ । यसअघिका भेरियन्टहरुमा जस्तो नागरिकहरुले पनि आफ्नो स्वास्थ्यप्रति ध्यान दिएको पाइदैँन । नागरिकहरुले निकै सामान्य ढंगले लिएको पाइएको छ । यो पनि कोरोना भाइरस फैलनुको अर्को मुख्य कारण हो ।

काभ्रेमा कोभिड संक्रमण दरलाई हेर्दा नियन्त्रण बाहिर गइसकेको छ । आज साझँ स्वास्थ्य कार्यालय काभ्रे सार्वजनिक गरेको विवरण अनुसार १ हजार ४३ जना कोभिड संक्रमित पुगेका छन् । जसमा११ जना अस्पतालमा भर्ना भएका छन् । बाँकी सबै घरमै छन् ।

तयारी गर्ने स्थानीय तहहरु आफै एकपछि अर्को बन्द भइरहेका छन् । रोशी, चौरीदेउराली, भुम्लु गाउँपालिका, नमोबुद्ध नगरपालिका लगायतले सेवा स्थगन गरेका छन् । यी पालिकाका जनप्रतिनिधि र कर्मचारी बढी संक्रमित भएका छन् ।

तयारीमा जुट्नु पर्ने निकाय नै कोभिडका कारण बन्द हुने अवस्थामा पुगेका कारण आफु र आफ्नो घर परिवार सचेत नहुने हो भने अवस्था भयबह बन्न सक्ने चिकित्सिकहरु बताउँछन् ।

धेरै जसो स्थानीयले यसअघि सञ्चालनमा ल्याएका आइसोलेसन सेन्टरमा सामान समेत अहिले नरहेको बताइन्छ ।