मङ्लबार, असार १७, २०८२
काभ्रेको बनेपा नगरपालिकाले भाडा नतिरेका सटरमा आज ताला लगाएको छ । नगरपालिकाले सटरमा ताला लगाएपछी व्यवसायीहरु आन्दोलित हुँदा बनेपा बसपार्क क्षेत्रमा तनाव सृजना भएको छ ।
सटर भाडा बापतको ३८ लाख ६० हजार रकम नतिरेको भन्दै नगरपालिकाले तीन वटा सटरमा आज ताला लगाएको हो । ताला लगाएकामध्ये इलाका हुलाक कार्यालय बनेपाको भवनमा रहेको सटरका ठेक्का कटुवाल निर्माण सेवा रोशी गाउँपालिका वडा नम्बर १ र नगरपालिकाको भवनमा रहेको ग्यारेज रहेको सटरको ठेक्का विमल पाण्डेले लिएका थिए ।
व्यवसायीले भाडा तिरेको बताएपनि ठेकेदार कम्पनी र व्यक्तिले उक्त बक्यौता नगरपालिकालाई नबुझाएको पाइएको हो । जसमध्ये कटुवाल निर्माण सेवा कम्पनीले २८ लाख ६० हजार र विमल पाण्डेले करिब १० लाख तिर्न बाँकी रहेको नगरपालिकाका राजस्व विभाग प्रमुख विनोद हुमागाईँले सबैको समाचारलाई जानकारी दिए ।नगरपालिकाले ठेकदार कम्पनीसंग ३६ महिनाको लागि सम्झौता गरेको थियो ।
यता व्यवसायीहरुलेले भने आफूहरुले ठेकदारलाई पैसा दिएको दाबी गर्दै बिना जानकारी बिनानै सटरमा ताला लगाएको आरोप लगाएका छन् । उनीहरुले नगरले लगाएको उक्त ताला फोड्ने प्रयास समेत गरेका थिए ।
राजस्व विभाग प्रमुख हुमागाईँले भने आफूहरुले ठेकदार कम्पनीलाई पटक पटक भाडा तिर्न ताकेता गर्दा पनि अटेर गरेपछि वेवास्ता गरेका कारण ताला लगाएको बताएका छन् ।
व्यवसायीले विना सूचना सटरमा ताला लगाएको बताएपनि नगरपालिकाले जारी गरेको सूचना उनीहरुलेनै च्यातेर फालेको नगरपालिकाले बताएको छ् । नगरपालिकाले आजै दिउँसो ताला लगाउनु अगाडी जिल्ला प्रशासन कार्यालय काभ्रेलाई पत्र पठाएको नगरपालिकाले जनाएको छ ।
नगपालिकामा स्थानीय चुनाव २०७९ बाट निर्वाचित भएर आएका जनप्रतिनिधिको दोस्रो बैठकलबाट नै भाडा नतिर्ने सटरमा ताला लगाउने निर्णय गरेको थियो ।
