नेपाली कांग्रेसका केन्द्रीय सदस्य एवं काभ्रे कांग्रेसका नेता गणेश लामाको नाम राष्ट्रिय सभा निर्वाचनका लागि सिफारिस भएको छ ।

बुधबार कांग्रेस बागमती प्रदेश सभापति इन्द्र बानियाँले राष्ट्रिय सभा सदस्य पदको निर्वाचनका लागि बागमती प्रदेशका १३ जिल्लाबाट गणेश लामा सहित ९१ जनाको नाम सिफारिस गरेका हुन् ।

लामा गत मंसिरमा सम्पन्न संघ र प्रदेश सभाको निर्वाचनमा काभ्रे निर्वाचन क्षेत्र नम्बर १ को प्रदेश सभा २ बाट निर्वाचनमा होमिन खोजेका थिए । तर गठबन्धनमा भागबण्डा नमिलेर पार्टी सभापति तीर्थ लामाले क्षेत्र परिवर्तन गरेपछि गणेश लामाले टिकट गुमाएका थिए ।

नेपाली कांग्रेस बागमती प्रदेश समितिको कार्य सम्पादन समितिले उम्मेदवार सिफारिसको सम्पूर्ण अधिकार सभापति बानियाँलाई नै दिएको थियो । सोही आधारमा बानियाँले जिल्लाबाट प्राप्त सिफारिसलाई अध्ययन गरी कांग्रेस केन्द्रीय कार्यालयमा सिफारिस गरेका हुन् ।

कांग्रेस बागमती प्रदेशले १० जना केन्द्रीय सदस्यसहित २ जना जिल्ला सभापतिलाई राष्ट्रिय सभा सदस्य पदको उम्मेदवार बनाउन सिफारिस गरेको छ भने ४ जना प्रदेश पदाधिकारी, २ जना जिल्ला सभापति र २ जना राष्ट्रिय व्यक्तित्वसहित ९१ जनालाई राष्ट्रिय सभा सदस्य पदको निर्वाचनमा उम्मेदवार बनाउन सिफारिस गरिएको छ ।

जसमा केन्द्रीय सदस्यहरू काभ्रेका गणेश लामा, दोलखाका जिप छिरिङ लामा, धादिङका दिलमान पाख्रिन, चितवनका टेक बहादुर गुरुङ रहेका छन् । काठमाडौँकी राधा घले, हरिशरण नेपाली, भक्तपुरका गंगा अवला, मदनकृष्ण श्रेष्ठ, ललितपुरका मदन अमात्य र जितजंग बस्नेत राष्ट्रिय सभा सदस्य पदको उम्मेदवारका लागि कांग्रेस बागमती प्रदेशले सिफारिस गरेको छ ।

प्रदेश पदाधिकारीबाट राष्ट्रिय सभा सदस्य पदमा उम्मेदवारका लागि सिफारिस हुनेमा उपसभापति चन्द्र महर्जन, महासचिव राजु श्रेष्ठ, सहमहामन्त्री जीवन डङ्गोल र हरिशरण श्रेष्ठ रहेका छन् ।

काठमाडौँका जिल्ला सभापति सबुज बानियाँ र मकवानपुरका सभापति बुद्ध लामा पनि राष्ट्रिय सभा सदस्य पदको उम्मेदवारका लागि प्रदेश समितिले सिफारिस गरेको छ । राष्ट्रिय व्यक्तित्व तर्फ कलाकार निर शाह र पत्रकार तारानाथ दाहाललाई राष्ट्रिय सभा सदस्य पदमा उम्मेदवार बनाउन सिफारिस गरिएको छ ।

आगामी फागुन २० गते एमालेका ९, कांग्रेसका ४ माओवादीका ३, एकीकृत समाजवादीका २, जसपाका १ र स्वतन्त्र सांसद १ जना गरी २० सांसदको पदावधि सकिँदै छ । पदावधि सकिनेमध्ये बागमती प्रदेशबाट ४ जना रहेका छन् । खिमलाल देवकोटा, एमालेबाट रामचन्द्र राई, दिल कुमारी रावल थापा ‘पार्वती’, र एकीकृत समाजवादीबाट सिंग बहादुर विश्वकर्माको पदावधि फागुन २० मा सकिने भएको हो ।