बुधबार, चैत्र १९, २०८१
काभ्रे : जर्मन रोटरीको सहयोगमा रोटरी क्लब अफ धुलिखेलको समन्वय र सहयोगमा धुलिखेल नगरपालिका सहित देशभरका ४ अस्पताललाई हेमोडायलाइसिस मेसिन ३६ वटा हस्तान्तरण गरिएको छ। आइतबार धुलिखेल नगरपालिकामा आयोजित एक कार्यक्रममा यी मेसिनहरू हस्तान्तरण गरिएको हो।
कार्यक्रमका दौरान रोटरी क्लब अफ धुलिखेल, धुलिखेल अस्पताल, र नगरपालिकाबीच ब्लड बैंक स्थापना तथा विद्युतीय शवदाह गृह निर्माण गर्ने समझदारीपत्रमा हस्ताक्षर तथा आदानप्रदान गरिएको थियो।
धुलिखेल अस्पताललाई १०, शिर मेमोरियल अस्पताललाई १०, कौशल्या मेमोरियल अस्पताललाई १०, र सहिद स्मृति सामुदायिक अस्पताललाई ६ गरी जम्मा ३६ वटा उपकरण हस्तान्तरण गरिएको छ।
कार्यक्रमलाई सांसद तथा उद्योगपति विनोद चौधरीले सम्बोधन गर्दै समाज विकासका लागि सकारात्मक सोच भएका जनप्रतिनिधि चयन भए विकासले गति लिने उदाहरण धुलिखेल बनेको बताउनुभयो। साथै, अन्तर्राष्ट्रिय संस्थाले दिएको सहयोग नेपालका नागरिकसम्म पुर्याउन सरकारी प्रक्रियाले झन्झटिलो अवस्था सिर्जना गरिरहेको भन्दै उहाँले असन्तोष व्यक्त गर्नुभयो। “रोटरीले यो प्रक्रिया पूरा गर्न ४ वर्ष लागेको छ, राम्रो काम गर्नेलाई दण्ड जस्तै भएको छ,” चौधरीले भन्नुभयो। उहाँले अनुदानमा आएका सामग्री ल्याउनका लागि राज्यले अनावश्यक हस्तक्षेप नगर्नुपर्ने धारणा राख्नुभयो। साथै, उहाँले धुलिखेल अस्पताल तथा नगरलाई वर्धघाट स्वास्थ्य नगर विकासमा समेत साझेदारी गर्न आग्रह गर्नुभयो।
कार्यक्रममा धुलिखेल अस्पतालका डा. विराज श्रेष्ठले उक्त उपकरणले मृगौला सम्बन्धी रोगीहरूलाई ठूलो राहत पुग्ने विश्वास व्यक्त गर्नुभयो। धुलिखेल नगरपालिकाले यी मेसिनहरू धुलिखेल अस्पताललाई हस्तान्तरण गरी नागरिकहरूलाई सेवा उपलब्ध गराउने योजना बनाएको छ। नगर प्रमुख अशोक ब्याञ्जुले धुलिखेललाई “स्वस्थ शहर”, “शून्य गरिबीको शहर”, “बालमैत्री शहर”, “साक्षर शहर”, “पर्यावरणमैत्री शहर” तथा “छुवाछूत मुक्त शहर” बनाउन सामाजिक संस्थाहरूसँग सहकार्य गरिने बताउनुभयो
रोटरी क्लबकी अध्यक्ष ज्योत्सना सैंजुले बनेपाको शिर मेमोरियल अस्पताल र बाँकेको कौशल्या मेमोरियल अस्पताललाई समेत केही उपकरण प्रदान गरिने जानकारी दिनुभयो। हस्तान्तरण गरिएका ३६ वटा मेसिनको मूल्य ५ करोड रुपैयाँभन्दा बढी पर्नेछ।
जर्मन रोटरी भोल्न्टर क्लबका प्रतिनिधिले आगामी दिनमा पनि यस्ता सहयोग जारी राख्ने प्रतिबद्धता जनाउँदै यसबाट नेपाली नागरिकको स्वास्थ्य अधिकार थप सुनिश्चित हुने विश्वास व्यक्त गर्नुभयो।
