काभ्रे, मंसिर २१ :  शनिवार अन्तर्राष्ट्रिय स्वयंसेवक दिवस नेपालमा पनि विभिन्न कार्यक्रम गरेर मनाइएको छ । नेपालमा वि.स. १९२७ सालदेखि समाज सेवाको काम सुरु भएको मानिन्छ । त्यसअघि विभिन्न गुठीको माध्यमबाट सामूहिक हितका लागि विभिन्न काम हुँदै आएको थियो ।

त्यसबेलाको पारम्परिक चलनअनुसार अहिले पनि भूकम्प, बाढी–पहिरो र अरु प्राकृतिक र मानवीय विपत्तिमा आउँदा स्वयंसेवकको ठूलो भूमिका रहँदै आएको छ । हरेक वर्षको डिसेम्बर ५ मा संयूक्त राष्ट्रसंघले अन्तर्राष्ट्रिय स्वयंसेवक दिवस मनाउँदै आएको छ ।

यसैबिच काभ्रेको पनौती नगरपालिकाले १७ औं राष्ट्रिय महिला सामुदायिक स्वास्थ्य स्वयंसेवीका दिवस मनाएको छ । कोभिड १९ को रोकथाम सबृद्धिका लागी संयुक्त कार्यःमहिला सामुदायिक स्वास्थ्य स्वयंसेवीकाको भुमिका अपरिहार्य भन्ने नाराका साथ नगरपालिकाको स्वास्थ्य शाखाले कार्यक्रम आयोजना गरेको थियो ।

कार्यक्रममा वडा नम्बर ७ का वडा अध्यक्ष रामचन्द्र नास्नानी,बागमती प्रदेश सभा सदस्य सांसद चन्द्र लामा,स्वास्थ्य शाखा प्रमुख पुरुषोत्तम तिमल्सिना, वडा नम्बर ७ का सदस्यहरु पुरुषोत्तम कर्माचार्य ,जीवन रघु श्रेष्ठ लगायतको उपस्थिति रहेको थियो ।

यस्तै वडा नम्बर ८ मा पनि दिवश मनाईएको छ । दिवशका अवसरमा वडामा कर्यरत महिला स्वास्थ्य स्वयंसेवीकाहरुलाई पुरस्कृत गरिएको थियो । उत्कृष्ट कार्यसेवाको मूल्यांकन गरी पुरस्कार वितरण गरिएको हो ।