काभ्रे, २५ साउनः काभ्रेको पनौती नगरपालिकाले आफ्ना नागरिकलाई जनस्वास्थ्यका सम्पूर्ण उपाय कडाईका साथ पालना गर्न आग्रह गरेको छ । उपप्रमुख गीता बञ्जाराले आइतबार नगरबासीलाई अपील गर्दै हिजो मात्रै संक्रमण देखिएको क्षेत्रका सबै नागरिकलाई घर भित्रै बस्न आग्रह गर्नुभएको छ ।

पनौतीमा हालसम्म ६ जनामा कोरोना संक्रमण पुष्टि भएको छ । त्यसमध्ये ५ जना उपचारपछि घर फर्किएको उपप्रमुख बञ्जाराले बताउनुभयो । नगरपालिकाको वडा नम्बर ३ घर भै हाल संघीय प्रहरी ईकाई कार्यालय जनागाल कार्यरत एक पुरुषमा हिजो कोरोना संक्रमण पुष्टि भएपछि नगरपालिकाले त्यस क्षेत्रका नागरिकलाई उच्च सतर्कता अपनाउन अपील गरेको हो ।

संक्रमितसँगको सम्पर्कमा आएका सबैको स्वाब संकलन तथा परीक्षण गर्ने काम भइरहेको भन्दै उपप्रमुख बञ्जाराले नतिजा नआउञ्जेलसम्म संक्रमितको सम्पर्कमा आएका सबैलाई घरभित्रै सुरक्षित बन्न आग्रह गर्नुभएको छ । पनौतीमा १२० जना क्वारेन्टाइनबाट हालसम्म डिस्चार्ज भएका छन् । ३ सय १४ जनाको पीसीआर विधि मार्फत कोरोना भाइरसको परीक्षण गरिएको छ ।

लकडाउन खुकुलो भएसँगै सार्वजनिक यातायात, पसल, कार्यालय, विभिन्न सामाजिक, साँस्कृतिक, धार्मिक क्षेत्रहरुमा भिड बढेको भन्दै नगरपालिकाले चिन्ता समेत ब्यक्त गरेको छ । नगरपालिकाले भिडभाड हुने क्षेत्रमा कोरोना संक्रमण बढ्न सक्ने भन्दै त्यस्ता क्षेत्रमा नजान आफ्ना नागरिकलाई आग्रह गरेको छ ।