सोमवार, असार १०, २०८१
जनकपुर । धनुषाको महेन्द्रनगरबाट बेपत्ता भएकी महिलाको शव फेला परेको छ ।
शनिबार राति मिथिला नगरपालिका-६ औरहीस्थित सामुदायिक वनको खोल्सामा महेन्द्रनगरकी २८ वर्षीया रुबी यादवको शव फेला परेको हो । रुवी जेठ २६ गतेदेखि वेपत्ता भएकी थिइन् ।
रुबीको हत्या श्रीमान् राजु यादवले गरेको पुष्टि भएको छ ।
श्रीमतीलाई बेपत्ता पारेको शङ्कामा राजुलाई इलाका प्रहरी कार्यालय सखुवाले गत बिहीबार नै नियन्त्रणमा लिएको थियो ।
राजुकै बयानको आधारमा शव फेला परेको इलाका प्रहरी कार्यालय सखुवा महेन्द्रनगरका प्रहरी निरीक्षक सोनुकुमार साहले बताए । उनका अनुसार राजुले हत्या गरेको स्वीकार गरिसकेका छन् ।
राजु केही महिनाअघि वैदेशिक रोजगारबाट फर्किएपछि विवाद भएको थियो । विवादको क्रममा राजुले रुबीलाई कुटपिट तथा यातना दिने गरेका थिए ।
बेपत्ता हुनुभन्दा पाँच दिनअघि निर्घात कुटपिट गरेपछि इलाका प्रहरी कार्यालय सखुवा महेन्द्रनगरमा छलफल भएको थियो ।
माइत पक्षले दिएको कर्तव्य ज्यानको जाहेरीको आधारमा राजुमाथि कारबाही प्रक्रिया अघि बढाउने प्रहरीले जनाएको छ ।
