काँग्रेसका पूर्व सभापति तथा संविधान जानी गर्न महत्वपूर्ण भूमिका निवार्ह गर्नुभएका तत्कालीन सभापति सुशील कोइराला प्रति आज एक कार्यक्रम गरी भावपूर्ण श्रद्धाजली अर्पण गरियो । केन्द्रीय कार्यालय सानेपाद्वारा आयोजित कार्यक्रममा काँग्रेसका शीर्ष नेताहरुले संविधानको प्रभावकारी कार्यान्वयन र निधारित मितिमा तीनै तहका निर्वाचन गर्न सकेमात्र स्व सुशिल कोइरालाप्रति सच्चा श्रद्धाञ्जलि हुने बक्ताहरुको भनाई थियो ।
सभापति शेरबहादुर देउवाले कोइरालाको दृढ अठोटले मात्र नेपालमा संविधानबाट संविधान जारी गर्न सफल भएको उल्लेख गर्दै संविधान कार्यान्वयन अहिलेको प्रमुख चुनौती रहेको बताउनुभयो ।  वरिष्ठ नेता रामचन्द्र पौडेलले स्व कोइरालाको दृढ निश्चय, सिद्धान्तप्रतिको निष्ठा र असल आचरणको सबै नेता कार्यकर्ताले आत्मसात् गर्नुपर्ने बताउँदै संविधान जारी गर्दाको दृढता दलहरुले कार्यान्वयनमा पनि देखाउनुपर्ने उल्लेख गर्नुभयो ।
आगामी निर्वाचनको कार्यसूची तय गरी काँग्रेस जनतामाझ जानुपर्ने सुझाव दिँदै उहाँले व्यवस्थापिका–संसद्मा विचाराधीन संविधान संशोधनको प्रस्तावलाई टुङ्ग्याई शीघ्र निर्वाचन मिति घोषणा गर्नुपर्ने बताउनुभयो ।
काँग्रेस महामन्त्री डा शशाङ्क कोइरालाले नेपालमा प्रजातन्त्र स्थापनाका लागि स्व कोइरालाको योगदान अतुलनीय रहेको स्मरण गर्दै संविधानको कार्यान्वयन र निर्धा्रित समयमा तीनै तहका निर्वाचन गर्न सकेमात्र स्व कोइरालाप्रति श्रद्धाञ्जलि हुने बताउनुभयो ।
कार्यक्रममा पार्टी कोषाध्यक्ष एवम् शान्ति तथा पुनःस्थापना मन्त्री सीतादेवी यादवले संविधानको संशोधन नभई सफल कार्यान्वयन हुन नसक्ने बताउँदै पार्टीमा गुटउपगुटको अन्त्य गर्न नेतृत्वलाई आग्रह गर्नुभयो ।
कार्यक्रममा पार्टीका नेता एवम् पूर्व महामन्त्रीद्वय प्रकाशमान सिंह र कृष्णप्रसाद सिटौला, पूर्व उपसभापति गोपालमान श्रेष्ठ, काठमाडौँ काँग्रेसका सभापति सबुज(कृष्ण) बानियाँ र नेपाल विद्यार्थी सङ्घका अध्यक्ष नैनसिंह महरले मुलुक र जनताका लागि स्व कोइरालाले गरेको त्याग तथा योगदानका बारेमा चर्चा गर्दै संविधान कार्यान्वयनमा सबै दल एकजुट हुुनुपर्ने धारणा व्यक्त गर्नुभयो । कोइरालाको अकल्पनीय रुपमा २०७२ माघ २५ गतेराति निधन भएको थियो ।