प्रधान सेनापति महारथी राजेन्द्र क्षत्रीले सातौं राष्ट्रिय खेलकुद प्रतियोगितामा सहभागी भएका नेपाली सेनाका खेलाडी एवं व्यवस्थापकीय टोलीहरुलाई सुनसरी जिल्लाको धरान स्थित फुस्रे क्याम्पमा आयोजित एक विशेष कार्यक्रमकावीच बधाई दिनु भएको छ ।

सातौं राष्ट्रिय खेलकुद प्रतियोगितामा नेपाली सेनाले ऐतिहासिक विजय हासिल गर्न सफल भएको हो । उक्त प्रतियोगिताको विभिन्न विधामा नेपाली सेनाको तर्फबाट ५११ जना खेलाडी तथा ७५ जना व्यवस्थापकीय टोलीहरु सहित जम्मा ५८६ जनाले सहभागीता जनाएका थिए ।

साथै उक्त प्रतियोगिता अन्तर्गत गत वर्ष सञ्चालन भएको स्वीमिङ्ग तर्फ २५ स्वर्ण, ट्राईथोलन तर्फ ४ स्वर्ण र यस वर्ष संचालन भएको अन्य विविध प्रतियोगिताहरुमा ११३ स्वर्ण गरी नेपाली सेनाका खेलाडीहरुले जम्मा १४२ स्वर्ण, ५९ रजत र ४२ कास्य गरी जम्मा २४३ पदक हासिल गरी समग्रमा सातौं राष्ट्रिय खेलकुद प्रतियोगिताको बन्न सफल भएको छ ।

यस प्रकारको राष्ट्रिय स्तरको प्रतियोगितामा पहिलो पटक ऐतिहासिक विजय हासिल गर्न सफल भएकोमा नेपाली सेना गर्व महशुस गर्दछ । साथै आगामी दिनहरुमा समेत उत्कृष्ट खेल प्रदर्शन गरी राष्ट्रिय झण्डा र राष्ट्रिय सम्मानलाई उचाईमा पुर्याई राष्ट्रिय तथा अन्तर्राष्ट्रिय खेल जगतमा नयां आयाम थप गरी खेल जगतलाई अझ उचाईमा पुर्याउने विश्वास नेपाली सेनाले लिएको छ ।

प्रधान सेनापति क्षत्री आजै धरान स्थित एन्फा टेक्निकल कम्प्लेक्समा भएको सातौं राष्ट्रिय खेलकुद प्रतियोगिताको समापन समारोहमा सहभागी हुनु भई काठमाण्डौं फिर्ता हुनु भएको छ ।